ព័ត៌មានឯករាជ

ព័ត៌មានថ្មីបំផុត

កម្ពុជាក្រោមជាអតីតទឹកដីនៃព្រះរាជាណាចក្រកម្ពុជា ស្ថិតនៅខាងកើតឆៀងខាងត្បូងនៃព្រះរាជាណាចក្រ កម្ពុជា ។ បច្ចុប្បន្ន ជាចំណែកមួយនៃទឹកដីសាធារណរដ្ឋសង្គមនិយមវៀតណាមប៉ែកខាងត្បូង (South Vietnam) ។ កម្ពុជាក្រោមត្រូវអាណានិគមបារាំងកាត់ផ្តាច់ពីកម្ពុជា ផ្តល់ទៅឲ្យអាជ្ញាធរវៀតណាមធ្វើអាណានិគមបន្តរហូតដល់សព្វថ្ងៃ ក្រោមច្បាប់អាណានិគមបារាំងលេខ៤៩-៧៣៣ ចុះថ្ងៃទី០៤ ខែមិថុនា ឆ្នាំ១៩៤៩ នៅទីក្រុង Toulon នៃប្រទេសបារាំង ។

កាលពីសម័យដើម ទឹកដីកម្ពុជាក្រោមគេហៅថាកម្ពុជាទឹកលិច ឬកម្ពុជាក្រោម (កម្ពុជាប៉ែកខាងក្រោម) ហើយ គេអាចហៅបានម៉្យាងទៀតថា ដែនដីសណ្ដទន្លេមេគង្គ (Mekong Delta) ។ នៅសម័យអាណានិគមបារាំងត្រួតត្រា ឥណ្ឌូចិន ទឹកដីកម្ពុជាក្រោមត្រូវបានបារាំងហៅថា Basse Cochinchine (កូសាំងស៊ីនក្រោម) ។

ចំពោះផ្ទៃដី និងចំនួនប្រជារាស្ត្រខ្មែរដែលកំពុងរស់នៅលើទឹកដីកម្ពុជាក្រោមសព្វថ្ងៃ នៅមានបញ្ហាស្មុគស្មាញ ណាស់ ពីព្រោះពុំមានវិជ្ជាស្ថានជាតិណាមួយបានធ្វើជំរឿន ឬកំណត់ឲ្យបានច្បាស់លាស់ទេ ។ ទោះបីជាយ៉ាងនេះក៏ដោយ យើងបានធ្វើការសិក្សាស្រាវជ្រាវតាមឯកសារដើមសម័យអាណានិគមបារាំងត្រួតត្រាឥណ្ឌូចិន បានបង្ហាញឲ្យឃើញថាទឹកដី កម្ពុជាក្រោមមានទំហំផ្ទៃដី ៦៨.៩៦៥ km² ។ តួលេខនេះ គិតតាមឯកសារបារាំងក្នុងឆ្នាំ១៩៤៥ ព្រោះនៅពេលនោះ អាណានិគមបារាំងបានបែងចែកទឹកដីនៅឥណ្ឌូចិនចំនួន ៥ប្រទេសដើម្បីងាយស្រួលក្នុងការត្រួតត្រា គឺ ៖

១. ប្រទេសយួន (តុងកឹង Tonking) មានផ្ទៃដី ១០៣.០០០ km² ។

២. ប្រទេសយួនហ្វេ (អណ្ណាម Annam) មានផ្ទៃដី ១៤៨.០០០ km² ។

៣. ប្រទេសលាវ មានផ្ទៃដី ២៣៦.០០០ km² ។

៤. ប្រទេសកម្ពុជា មានផ្ទៃដី ១៨៥.០០០ km² ។

៥. កម្ពុជាក្រោម មានផ្ទៃដី ៦៥.០០០ km² ។

បច្ចុប្បន្ននេះ ប្រទេសកម្ពុជាប្រកាសជាផ្លូវការថាមានផ្ទៃដី ១៨១.០៣៥ km² ។ ដូច្នេះ ទឹកដីកម្ពុជាក្រោមត្រូវ កើនបន្ថែមចំនួន ៣.៩៦៥ Km² បូកនឹង ៦៥.០០០ km² ត្រូវជា ៦៨.៩៦៥ km² (185.000 Km² – 181.035 km²+ 65.000 km² =68.965 km²) ។

រីឯចំនួនប្រជារាស្ត្រខ្មែរនៅកម្ពុជាក្រោមវិញ យើងបានធ្វើជំរឿនដោយផ្អែកទៅលើ ឯកសារចំនួន ៥ ដូចខាងក្រោម ៖

ទី១ តួលេខសម្រង់ស្ថិតិខ្មែរកម្ពុជាក្រោមរបស់រដ្ឋាភិបាលអាណានិគមបារាំងនៅក្នុងឆ្នាំ១៩២៤ មាន ៨០.០០០ (ប្រាំបីម៉ឺន) នាក់ ។

ទី២ តួលេខស្រង់ស្ថិតិរបស់រណសិរ្សរំដោះកម្ពុជាក្រោមនៅឆ្នាំ ១៩៦៨ មាន ៤.០៤៧.៥០០ (បួនលានបួនម៉ឺនប្រាំ ពីរពាន់ប្រាំរយ) នាក់ ។

ទី៣ សេចក្តីថ្លែងការណ៍ផ្ទាល់មាត់របស់លោកប្រធានាធិបតីវៀតណាម ង្វៀន វ៉ានធីវ នៅទីក្រុងព្រែកឫស្សីក្នុងឆ្នាំ ១៩៦៩ ថាប្រជារាស្ត្រខ្មែរកម្ពុជាក្រោមមានប្រមាណជាង ៤.០០០.០០០ (បួនលាន) នាក់ ។

ទី៤ ឯកសារសមាគមខ្មែរកម្ពុជាក្រោមនៅប្រទេសបារាំងឆ្នាំ ១៩៦៩ បានសរសេរថាខ្មែរនៅកម្ពុជាក្រោមមានចំនួន ៤.៥០០.០០០ (បួនលានប្រាំសែន) នាក់ ។

ទី៥ តួលេខបូកសរុបប្រជារាស្ត្រខ្មែររបស់រដ្ឋាភិបាលខ្មែរនៅសាលសន្និសីទចតុម្មុខក្នុងឆ្នាំ ១៩៧០ ឃើញប្រជារាស្ត្រខ្មែរនៅកម្ពុជាក្រោមមានចំនួន ៤.៥០០.០០០ នាក់។ រីឯនៅកម្ពុជានាពេលនោះពលរដ្ឋខ្មែរមានចំនួនជិត ៧.០០០.០០០ (ប្រាំពីរលាន) នាក់ ។

ដូច្នេះ បានសេចក្តីថា សព្វថ្ងៃនេះ ពុំមានឯកសារណាមួយ ឬ ប្រភពណាមួយបានធ្វើជំរឿនស្ថិតិប្រជារាស្ត្រខ្មែរកម្ពុជាក្រោមឲ្យបានច្បាស់លាស់ពិតប្រាកដទេ ។

ប្រភព៖ សហគមន៍ខ្មែរកម្ពុជាក្រោម

ភាពខុសគ្នារវាងខ្មែរនៅកម្ពុជាក្រោម និង ខ្មែរនៅកម្ពុជាពេលបុណ្យចូលឆ្នាំចិន យួន

នយោបាយ ប្រវត្តិសាស្ត្រ រូបភាព វប្បធម៌ សង្គម សេដ្ឋកិច្ច អន្តរជាតិ

11:36:00

តើខ្មែរនៅកម្ពុជាក្រោមមានរីករាយអបអរសាទរបុណ្យចូលឆ្នាំចិន យួនដូចខ្មែរនៅកម្ពុជាដែរឬទេ? តើខ្មែរក្រោមមានប្រកាសខ្លួនឯងថាជាខ្សែកាត់ចិន ឬ កាត់យួន ដើម្បីចូលរួមក្នុងពិធីបុណ្យនេះដែរឬទេ?

សូមលោកអ្នកអាននូវបទវិភាគមួយរបស់ អនុបណ្ឌិតផ្នែកវិទ្យាសាស្ត្រនយោបាយ លោក នី វិបុល ដែលជាសហការីនៃវិទ្យុសេរីកម្ពុជាក្រោម ដូចតទៅនេះ៖

ចូលឆ្នាំចិន ឬ យួន គេតែងតែឃើញថា ប្រជាពលរដ្ឋកម្ពុជាមួយចំនួនដែលតាំងខ្លួនឯងថា ជាខ្សែកាត់ចិន ហើយបានប្រារព្ធឡើងនូវពិធីនេះ ដោយមានការសែនថ្វាយនូវគ្រឿងបូជាផ្សេងៗតាមរបៀបប្រពៃណីចិន និង យួន ព្រមទាំងមានការរាំច្រៀង ស៊ីផឹក លេងល្បែង ។ល។ សប្បាយអ៊ូអរ ។

នៅតាមដងផ្លូវគេឃើញថា ស្ទើរតែគ្រប់ហាងបានតុបតែង ចង្កៀងគោមពណ៌ក្រហម បិទស្លាកអក្សរចិនដែលមិនដឹងថាមានន័យយ៉ាងម៉េច ។ ហាងមួយចំនួនទៀត គេថែមទាំងចាក់ធុងបាស បទចម្រៀងចិន «កុង ស៊ី ផា ឆាយ» យ៉ងអធិកអធម បើប្រៀបធៀបភាពសប្បាយអ៊ូអរនេះ ភ្នំពេញមិនចាញ់ក្រុងហាណូយ ឬ ក្រុងប៉េកាំងឡើយ ។

ឯទូរទស្សន៍ និង ប្រព័ន្ធផ្សព្វផ្សាយនានា ក្នុងអំឡុងប៉ុន្មានថ្ងៃចូលឆ្នាំចិន យួន ស្ទើរតែមិនដឹងថាប៉ុស្តិ៍ទូរទស្សន៍នោះជារបស់ខ្មែរ ឬ ចិន ទៅហើយ ។ គ្រប់ប៉ុស្តិ៍គេជួនពរគ្នា «ហេងហេង» មានរូបភាពផាវផ្ទុះក្ឌុងក្ឌាំង មិនត្រឹមតែប៉ុណ្ណោះទេ គេនៅបើកកម្មវិធីប្រគំតន្ត្រី ហើយគេឲ្យតារាចម្រៀង និង ពិធីករ ពិធីករណី ច្រៀងរាំជាភាសាចិន សប្បាយពេកក្រៃ ។

រីឯកម្មករបុគ្គលិក រោងចក្រ ក្រុមហ៊ុន នានាវិញ ត្រូវបានអនុញ្ញាតឲ្យឈប់សម្រាកដើម្បីត្រឡប់ទៅស្រុកជួបជុំញត្តិសន្តានក្នុងឱកាសចូលឆ្នាំចិននេះ ពួកគេហាក់បីដូចជាមានភាពត្រេកអរខ្លាំងណាស់ពេលដល់ចូលឆ្នាំចិនម្ដងៗ ។ ចំណែកមន្ត្រីរាជការ គ្រូបង្រៀន សិស្ស និស្សិត មួយចំនួនឲ្យតែដល់ថ្ងៃចូលឆ្នាំចិននេះ ពួកគេតែងតែឈប់សម្រាកដោយខ្លួនឯង ទោះបីជាស្ថាប័នដែលពាក់ព័ន្ធមិនអនុញ្ញាត ឬ មានច្បាប់ណាមួយដែលអនុញ្ញាតថា ត្រូវឈប់សម្រាកការងារនៅក្នុងថ្ងៃចូលឆ្នាំចិន យួន នេះក៏ដោយ នេះជាទម្លាប់ ប្រពៃណីរបស់ខ្មែរយើងឬ? ។

ឥទ្ធិពលមួយនេះកំពុងតែគ្របដណ្ដប់មកលើសង្គមកម្ពុជាបច្ចុប្បន្នយ៉ាងខ្លាំងបំផុត ដែលកូនខ្មែរគ្រប់រូបតែងតែតាំងខ្លួនឯងថាជាខ្សែកាត់ចិននោះ ត្រេកអរនឹងទទួលយកដោយមិនគិតថាវាអាចប៉ះពាល់ដល់វប្បធម៌ខ្លួនយ៉ាងណានោះទេ ។ បានលើកឡើងដូចនេះមិនមែនចង់ឲ្យអភិរក្សវប្បធម៌ខ្មែរ ហើយបដិសេធន៍មិនទទួលយកវប្បធម៌បរទេសនោះទេ ប៉ុន្តែយើងមិនមែនចេះតែទទួលយកនូវវប្បធម៌បរទេសដោយគ្មានការពិចារណាច្បាស់លាស់ដូច្នេះឡើយ ដោយយើងត្រូវចេះបែងចែកអ្វីជាវប្បធម៌ខ្មែរ ហើយអ្វីជាវប្បធម៌បរទេស ។

យើងត្រឡប់ទៅស្វែងយល់នៅសង្គមកម្ពុជាក្រោមម្ដងវិញ ថាតើប្រជាពលរដ្ឋខ្មែរនៅកម្ពុជាក្រោម

មានប្រារព្ធពិធីបុណ្យចូលឆ្នាំចិន យួន ដូចនៅកម្ពុជាដែរឬទេ?

កម្ពុជាក្រោមអតីតជាដែនដីមួយចំណែកនៃព្រះរាជាណាចក្រកម្ពុជា ដែលត្រូវបានជនជាតិយួនដាក់អាណានិគមចាប់តាំងពីដើមសតវត្សទី១៩ រហូតមកទល់បច្ចុប្បន្ននេះ ។ ក្រោយពីជាង២០០ឆ្នាំនៅក្រោមការគ្រប់គ្រងរបស់ពួកយួន ។ ខ្មែរនៅកម្ពុជាក្រោមត្រូវបានយួនចាប់បង្ខំគោរព ប្រតិបត្តិ និង ទទួលយកនូវវប្បធម៌ ព្រមទាំងរៀននូវអក្សរ ភាសាយួន ។ ចាប់ដាក់គុក សម្លាប់ រំលោភបំពានទៅលើសិទ្ធិសេរីភាព ចាប់បង្ខំព្រះសង្ឃឲ្យកោរសក់ទុកចិញ្ចើម ស្លៀកខោពាក់អាវ សូត្រធម៌គោះត្រឡោក ការហាមឃាត់មិនឲ្យមានទំនាក់ទំនងជាមួយខ្មែរនៅក្រៅប្រទេស មិនឲ្យរៀនអក្សរខ្មែរ គាបសង្កត់សិទ្ធិទទួលបានព័ត៌មាន ។ល។ ទោះបីជាមានការធ្វើទុក្ខបុកម្នេញសំណាក់រដ្ឋាភិបាលយួនយ៉ាងណាក៏ដោយ ក៏ខ្មែរនៅកម្ពុជាក្រោមនៅតែតស៊ូប្រឆាំងគ្រប់រូបភាពដែលរដ្ឋាភិបាលយួន បានរំលោភបំពានមកលើខ្លួន ។

កម្ពុជាក្រោមមាន ២១ខេត្តក្រុង មានវត្តអារាម ៥៦៧វត្ត មានព្រះសង្ឃចំនួន ២សែនអង្គ ចំនួនប្រជាជនខ្មែរនៅកម្ពុជាក្រោមសរុប ជាង១៥លាននាក់ ។ ប្រជាពលរដ្ឋខ្មែរនៅកម្ពុជាក្រោម៩៩% ជាអ្នកគោរពប្រតិបត្តិព្រះពុទ្ធសាសនា ។

ថ្វីត្បិតតែប្រជាពលរដ្ឋខ្មែរនៅកម្ពុជាក្រោមសព្វថ្ងៃនេះ ត្រូវរស់ក្រោមនឹមអាណានិគមនៃរដ្ឋាភិបាលយួនកុម្មុយនិស្តក្ដី ក៏ប៉ុន្តែអ្វីដែលធ្វើឲ្យយើងចាប់អារម្មណ៍ និង មិនគួរឲ្យជឿ ហើយទ្រាំសរសើរមិនបាននោះគឺ ការរក្សានូវ វប្បធម៌ ទំនៀមទម្លាប់ ប្រពៃណី អក្សរសាស្ត្រខ្មែរ នៅតែល្អខ្ជាប់ខ្ជួនដដែល មិនចាញ់ខ្មែរយើងនៅកម្ពុជាឡើយ ។

ចំណែកពិធីបុណ្យចូលឆ្នាំចិន យួនវិញនោះ ខ្មែរនៅកម្ពុជាក្រោមមិនដែលប្រារព្ធ ឬ ខ្វល់ខ្វាយដូចខ្មែរនៅកម្ពុជាឡើយ ។ អ្នកដែលបានអាននូវបទវិភាគនេះហើយ ច្បាស់ជាមានការងើយឆ្ងល់ចំពោះបញ្ហានេះជាមិនខានឡើយ ថាតើហេតុអ្វីខ្មែរនៅកម្ពុជាក្រោមដែលរស់នៅក្រោមការគ្រប់គ្រងរបស់យួន មិនខ្វល់ខ្វាយ ឬ ប្រារព្ធសែនថ្វាយក្នុងបុណ្យចូលឆ្នាំចិន យួននេះ ប៉ុន្តែខ្មែរនៅកម្ពុជាដែលរស់ក្រោមរដ្ឋាភិបាលខ្មែរ ដោយគ្មានការគាបសង្កត់ផ្នែកវប្បធម៌បែរជាទៅខ្វល់ខ្វាយ ឬ សែនថ្វាយក្នុងបុណ្យចូលឆ្នាំប្រពៃណីចិន យួននេះទៅវិញ ។

បើតាមការគិតរបស់អ្នកដែលមិនបានទៅដល់ទឹកដីកម្ពុជាក្រោម ច្បាស់ណាស់គេនិងគិតថាខ្មែរនៅកម្ពុជាក្រោមនឹងប្រារព្ធពិធីចូលឆ្នាំចិន យួនជាមិនខានឡើយ ប៉ុន្តែប្រសិនបើយើងទៅស្វែងយល់អំពីស្ថានការណ៍ជាក់ស្ដែងខ្មែរនៅឯកម្ពុជាក្រោមវិញនោះ គឺខ្មែរនៅកម្ពុជាក្រោមមិនដែលខ្វល់ខ្វាយ សែនថ្វាយនូវគ្រឿងផ្សេងៗ និងប្រារព្ធពិធីបុណ្យចូលឆ្នាំចិន យួននេះ ដូចនៅកម្ពុជាឡើយ ។ ទោះបីខ្មែរនៅកម្ពុជាក្រោម មានការរស់នៅជាមួយជនជាតិយួនក៏ដោយ ក៏ប៉ុន្តែចិត្តគំនិត បេះដូង ឈាមជ័រ នៅតែជាខ្មែរដដែល ។

ដោយខ្មែរនៅកម្ពុជាក្រោមត្រូវបានរំលោភបំពានសិទ្ធិនានាពីសំណាក់រដ្ឋាភិបាលយួនកុម្មុយនិស្ត ដូច្នេះហើយទើបធ្វើឲ្យខ្មែរនៅកម្ពុជាក្រោមជាទូទៅ តែងតែស្គាល់នូវតម្លៃចំពោះពាក្យថា «ខ្មែរ» និងផ្ដល់តម្លៃចំពោះកេរ្តិ៍មរតកដូនតាខ្មែរបន្សល់ទុក ដូចជាវប្បធម៌ អក្សរសាស្ត្រ ។ល។ ដោយសារតែខ្មែរនៅកម្ពុជាក្រោមខ្លាចយួនលុបបំបាត់នូវវប្បធម៌ខ្លួនឲ្យសាបសូន្យ ហើយខ្លាចកូនចៅខ្លួនជំនាន់ក្រោយមិនបានដឹងនូវអត្តសញ្ញាណជាតិខ្លួន ដូច្នេះហើយទើបពួកគេខំប្រឹងប្រែងក្នុងការថែរក្សានូវវប្បធម៌នេះ ។ផ្ទុយទៅវិញខ្មែរនៅកម្ពុជា មិនសូវជាយកចិត្តទុកដាក់ក្នុងការថែរក្សានូវវប្បធម៌ជាតិខ្លួនឲ្យបានរីកចម្រើនឡើយ តែងតែទទួលយកនូវវប្បធម៌បរទេសដោយគ្មានការពិចារណាឲ្យបានច្បាស់លាស់ ដោយសារតែខ្មែរនៅកម្ពុជាតែងតែមានគំនិតមួយថាវប្បធម៌យើងមិនមានដៃ ឬ មានជើងរត់ចោលយើងឡើយ ហេតុដូច្នេះទើបធ្វើឲ្យពួកគេមិនខ្វល់អំពីឥទ្ធិពលវប្បធម៌បរទេសដែលកំពុងហូរចូលមក ៕

ពាក្យសម្ដី៣០ឃ្លាសម្រាប់អ្នកចូលចិត្តអានសៀវ

នយោបាយ ប្រវត្តិសាស្ត្រ រូបភាព វប្បធម៌ សង្គម សេដ្ឋកិច្ច អន្តរជាតិ

11:32:00

ខ្ញុំចូលចិត្តអានសៀវភៅណាស់ គឺអានជារៀងរាល់ថ្ងៃតែម្ដង ។ ក្នុងមួយថ្ងៃ បើរវល់ខ្លាំងបំផុតក៏ខ្ញុំអាចអានបានប្រហែលជា១០សន្លឹកដែរ ។ ដូច្នេះនៅពេលណាដែលខ្ញុំប្រទះភ្នែក នឹងពាក្យសម្ដី ឬទស្សនៈណាទាក់ទងនឹងការអាន ឬ អ្នកអាន ខ្ញុំក៏កត់ទុកដើម្បីរំលឹកខ្លួនឯងថា ត្រូវតែធ្វើជាអ្នកអានរហូត ។ ថ្ងៃនេះខ្ញុំលើកយកពាក្យសម្ដីមួយចំនួនដែលខ្ញុំបានកត់ទុកនោះ មកចែកដល់អ្នកទាំងអស់ ។ សូមកត់ចំណាំ បើសិនជាគិតថាឃ្លាមួយណាពេញចិត្តរបស់យើង ។

១. អ្នកអានម្នាក់ មានជីវិតរាប់ពាន់មុននឹងស្លាប់ អ្នកដែលមិនធ្លាប់អាន មានជីវិតតែមួយប៉ុណ្ណោះ –George R. R. Martin

២. អ្នកអានកាន់តែច្រើន អ្នកដឹងរឿងកាន់តែច្រើន អ្នករៀនកាន់តែច្រើន អ្នកទៅបានកាន់តែច្រើនកន្លែង – Dr. Seuss

៣. សៀវភៅ ជាមិត្តដ៏ស្មោះត្រង់ បើអ្នកទុកវាចោល វានឹងរង់ចាំអ្នករហូត តែបើអ្នកចាប់កាន់វាវិញ វានៅតែស្រលាញ់អ្នកដដែល – John Green

៤. គ្មានអ្វីគួរឱ្យរីករាយដូចជាការអានសៀវភៅនោះទេ បើខ្ញុំមានផ្ទះខ្លួនឯង ខ្ញុំមុខជាវេទនាមិនខាន បើគ្មានបណ្ណាល័យល្អមួយក្នុងផ្ទះ - Jane Austen

៥. អ្នកមិនមានពេលសម្រាប់អាន អ្នកក៏មិនមានពេលសម្រាប់សរសេរដែរ – Stephen King

៦. កុំអានដូចកូនក្មេង អានដើម្បីរស់នៅ – Gustave Flaubert

៧. អ្នកមិនចាំបាច់ដុតសៀវភៅចោលទាំងអស់ដើម្បីបំផ្លាញវប្បធម៌ទេ គ្រាន់តែធ្វើឱ្យមនុស្សលែងអានសៀវភៅគ្រប់គ្រាន់ហើយ – Ray Bradbury

៨. មនុស្សដែលស្រលាញ់ការអាន តែងតែមិនសូវមានអារម្មណ៍ឆេវឆាវទេ – Pat Conroy

៩. នៅមានទោសឧក្រិដ្ឋមួយទៀតដែលធ្ងន់ជាងការដុតសៀវភៅទៀត នោះគឺការមិនបានអានវា – Joseph Broadsky

១០. គិតមុនពេលអ្នកនិយាយ អានមុនពេលអ្នកគិត – Fran Lebowitz

១១. ប្រសិនបើអ្នកទៅផ្ទះជាមួយអ្នកណាម្នាក់ ហើយគេមិនមានសៀវភៅទេនោះ កុំដេកជាមួយគេអី – John Waters

១២. ថ្ងៃនេះជាអ្នកអាន ថ្ងៃក្រោយជាអ្នកដឹកនាំ – Margaret Fuller

១៣. ដំណេកល្អ តែសៀវភៅល្អជាង - George R.R. Martin

១៤. ស្រលាញ់សៀវភៅជាងភាពយន្ត ភាពយន្តប្រាប់អ្នកពីអ្វីដែលត្រូវគិត ប៉ុន្តែសៀវភៅល្អអនុញ្ញាតឱ្យអ្នកជ្រើសរើសអ្វីដែលអ្នកត្រូវគិត – Karen Marie Moning

១៥. ពិភពលោកជារបស់យើងនៅពេលកំពុងអាន – Betty Smith

១៦. អ្វីគ្រប់យ៉ាងដែលមាននៅក្នុងលោក នឹងមាននៅក្នុងសៀវភៅ – Stephane Mallarme

១៧. ខ្ញុំចូលចិត្តអានសៀវភៅពេក រហូតដល់ខ្ញុំត្រូវតែសរសេរវា – Oscar Wilde

១៨. សៀវភៅដែលល្អបំផុត គឺសៀវភៅដែលប្រាប់អ្នកពីអ្វីដែលអ្នកបានដឹងរួចហើយ – George Orwell

១៩. សៀវភៅជួយឱ្យពួកយើងយល់ថាខ្លួនឯងជាអ្នកណា ត្រូវធ្វើអ្វី ហើយក៏បានបង្ហាញយើងថាតើសង្គម និងមិត្តភាពមានន័យយ៉ាងម៉េច វាប្រាប់យើងពីរបៀបរស់នៅ និង ស្លាប់ – Anne Lamott

២០. នៅពេលដែលយើងអានរឿងមួយ យើងនឹងរស់នៅក្នុងនោះ ក្របសៀវភៅប្រៀបដូចជាដំបូល និង ជញ្ជាំង អ្វីដែលនឹងកើតឡើងបន្ទាប់ទៀត គឺស្ថិតនៅក្នុងជញ្ជាំងទាំងនេះ – John Berger

២១. ការបង្រៀនកូនក្មេងឱ្យក្លាយជាអ្នកអានសៀវភៅមិនគួរឱ្យខ្លាចទេ តែគួរឱ្យរីករាយ និង រំភើប ហើយការរៀនធ្វើជាអ្នកអានផ្តល់ប្រយោជន៍ដ៏អស្ចារ្យដល់អ្នក – Roald Dahl

២២. ទោះបីជាអ្នកគិតថាអ្នករវល់យ៉ាងណាក៏ដោយ ក៏អ្នកត្រូវតែរកពេលដើម្បីអានដែរ បើមិនដូច្នោះទេ មានតែជ្រើសរើសភាពល្ងង់ខ្លៅសម្រាប់ខ្លួនឯង – Atwood H. Townsend

១៣. សៀវភៅស្រលាញ់មនុស្សគ្រប់គ្នាដែលបើកវា – Cornelia Funke

២៤. ការអានសៀវភៅល្អ ប្រៀបដូចជាការបត់ជើងតូច អ្នកមិនអាចបញ្ឈប់វាបានទេបន្ទាប់ពីអ្នកចាប់ផ្ដើមហើយ – Jonh Green

២៥. អានដើម្បីរៀន និង អភិវឌ្ឍខ្លួន អានដើម្បីសើច និង ជំរុញទឹកចិត្តខ្លួនឯង – Gary Paulsen

២៦. សៀវភៅមួយក្បាល គឺជាមិត្តភក្តិម្នាក់ – Gary Paulsen

២៧. រឿងដែលចម្លែកអំពីមនុស្សដែលមានសៀវភៅច្រើន គឺពួកគេនៅតែចង់បានបន្ថែមទៀត – Patricia A. McKillip

២៨. កុំអានសៀវភៅតែមួយប្រភេទ អានសៀវភៅផ្សេងៗគ្នានោះអ្នកអភិវឌ្ឍតាមបែបផែនផ្សេងៗគ្នាបាន – R.L. Stine

២៩. មនុស្សដែលអានច្រើនពេល ហើយប្រើខួរក្បាលតិចពេក នឹងបង្កើតជាទម្លាប់ខ្ជិលគិត –Abert Einstein

៣០. នៅក្នុងសៀវភៅ ខ្ញុំមិនត្រឹមតែបានធ្វើដំណើរទៅពិភពអ្នកដទៃទេ ប៉ុន្តែក៏ចូលទៅពិភពខ្លួនឯងដែរ – Anna Quindlen

ពាក្យសម្ដីទាំងអស់នេះ គឺខ្ញុំបានជួបវានៅលើប្រព័ន្ធអ៊ីនធឺណិត និង សៀវភៅមួយចំនួន ហើយគេសរសេរជាភាសាអង់គ្លេសទេ ។ ការបកប្រែរបស់ខ្ញុំប្រហែលជាមិនទាន់បានល្អនោះទេ តែខ្ញុំគិតថាអាចអានយល់ ហើយក៏ស្រួលយល់ដែរ ។ ខ្ញុំសង្ឃឹមថាបន្ទាប់ពីអានហើយ នឹងមានអ្នកផ្លាស់ប្តូរចិត្តមកស្រលាញ់ការអានសៀវភៅវិញចុះ ។ ការអានសៀវភៅ ជាការរៀនម្យ៉ាងដែលមិនចាំបាច់ចំណាយពេលច្រើននោះទេ ។ ធ្វើដូចខ្ញុំក៏បាន មួយថ្ងៃអានបន្តិចៗ យូរៗគង់តែចប់មួយក្បាលទេ ។ ហើយបើអានចប់មួយក្បាលហើយ ក្បាលទីពីរលែងមានបញ្ហាហើយ ។ ខ្ញុំអត់បានសរសេរពាក្យសម្ដីខ្លួនឯងនៅខាងលើ សុំដាក់នៅខាងក្រោមវិញ “អ្នកអានល្អ ត្រូវចេះចែករំលែក សូមធ្វើខ្លួនជាអ្នកអានល្អគ្រប់គ្នា ដើម្បីការរីកចម្រើនរបស់មនុស្សជាតិ” ។

ព័ត៌មានឯករាជ

នយោបាយ

ផ្ទាងផ្សាយពាណិជ្ជកម្ម

អន្តរជាតិ

សេដ្ឋកិច្ច

វប្បធម៌

ផ្ទាងផ្សាយពាណិជ្ជកម្ម

ព័ត៌មានថ្មីបំផុត

ភាគ១. ប្រវត្តិសាស្ត្រដែនដីកម្ពុជាក្រោម អំពីដែនដី និងប្រជាជន

ភាពខុសគ្នារវាងខ្មែរនៅកម្ពុជាក្រោម និង ខ្មែរនៅកម្ពុជាពេលបុណ្យចូលឆ្នាំចិន យួន

ពាក្យសម្ដី៣០ឃ្លាសម្រាប់អ្នកចូលចិត្តអានសៀវ

ផ្ទាងផ្សាយពាណិជ្ជកម្ម

ព័ត៌មានឯករាជ

នយោបាយ

ផ្ទាងផ្សាយពាណិជ្ជកម្ម

អន្តរជាតិ

សេដ្ឋកិច្ច

វប្បធម៌

ផ្ទាងផ្សាយពាណិជ្ជកម្ម

ព័ត៌មានថ្មីបំផុត

ភាគ១. ប្រវត្តិសាស្ត្រដែនដីកម្ពុជាក្រោម អំពីដែនដី និងប្រជាជន

ភាព​ខុស​គ្នា​រវាង​ខ្មែរ​នៅ​កម្ពុជាក្រោម និង ខ្មែរ​នៅ​កម្ពុជា​ពេល​បុណ្យ​ចូលឆ្នាំ​ចិន យួន

ពាក្យ​សម្ដី​៣០ឃ្លា​សម្រាប់​អ្នក​ចូល​ចិត្ត​អាន​សៀវ

ផ្ទាងផ្សាយពាណិជ្ជកម្ម

ភាពខុសគ្នារវាងខ្មែរនៅកម្ពុជាក្រោម និង ខ្មែរនៅកម្ពុជាពេលបុណ្យចូលឆ្នាំចិន យួន

ពាក្យសម្ដី៣០ឃ្លាសម្រាប់អ្នកចូលចិត្តអានសៀវ